وزیراعظم محمد شہباز شریف نے دریائے چناب، ستلج اور راوی میں شدید سیلاب کے خطرات کے پیش نظر وفاقی وزراء کو متاثرہ علاقوں کا فوری دورہ اور امدادی کارروائیوں کی نگرانی کرنے کی ہدایت کی ہے ۔ منگل کو وزیر اعظم آفس کے میڈیا ونگ کی طرف سے جاری بیان کے مطابق وزیراعظم نے وفاقی وزراء کو پنجاب کے سیلاب سے متاثرہ علاقوں اور اپنے متعلقہ حلقوں میں موقع پر موجود رہ کر انخلاء، ریسکیو و ریلیف کی سرگرمیوں کی خود نگرانی کرنے کی ہدایت کی۔ وزیرِ اعظم نے دریائے چناب، راوی اور ستلج میں ممکنہ سیلابی صورتحال کے پیش نظر نیشنل ڈیزاسٹر مینجمنٹ اتھارٹی اور دیگر متعلقہ اداروں کو ہائی الرٹ پر رہنے کی ہدایت بھی کی۔
انہوں نے چیئرمین این ڈی ایم اے کو پی ڈی ایم اے کیساتھ رابطے اور مکمل معاونت فراہم کرتے ہوئے متاثرہ علاقوں میں لوگوں کو پیشگی صورت حال کی اطلاع کرنے اور خطرے سے دوچار علاقوں سے لوگوں کو فوری طور پر محفوظ مقامات پر منتقل کرنے کے احکامات بھی جاری کیے، وزیراعظم نے نیشنل ڈیزاسٹر مینجمنٹ اتھارٹی اور صوبائی ڈیزاسٹر مینجمنٹ اتھارٹی کو صورتحال کا لمحہ بہ لمحہ جائزہ لینے کی ہدایت بھی کی۔ انہوں نے حکم دیا کہ امدادی کارروائیاں مزید تیز کی جائیں اور اداروں کے آپس کے روابط بڑھائے جائیں، دریائی گذرگاہوں کے کنارے آباد افراد کو فوری طور پر محفوظ مقامات پر منتقل کرنے کے عمل کو مزید موثر اور تیز بنایا جائے ۔