پشاور (بیورو رپورٹ)
15 اکتوبر 2026
گورنر خیبرپختونخوا فیصل کریم کنڈی نے پولیس کی تنخواہوں اور شہداء پیکج سمیت مختلف مراعات میں اضافے کا اعلان کر دیاہے۔
گورنر ہاؤس پشاور میں پولیس شہداء کے ورثاء میں پلاٹوں کے الاٹمنٹ لیٹرز تقسیم کرنے کی تقریب کا انعقاد کیا گیا، جس میں گورنر نے 54 پولیس شہداء کے ورثاء میں پلاٹوں کے الاٹمنٹ لیٹرز تقسیم کئے۔
گورنر ہاؤس میں تقریب سے خطاب کرتے ہوئے گورنر خیبرپختونخوا فیصل کریم کنڈی نے کہا کہ خیبرپختونخوا پولیس کی تنخواہیں باقی صوبوں کی تنخواہوں سے بہتر ہونی چاہیے۔
گورنرکے پی کے نے کہا کہ پولیس نفری کی کمی دور کرنے کے لئے خالی آسامیوں پر بھرتیوں کا عمل تیز کیا جائے گا۔
فیصل کریم کنڈی نے دہشت گردی میں جاں بحق پولیس اہلکاروں کے اہل خانہ کے لیے خصوصی مالی معاونت پیکج اور شہداء کی بیٹیوں کی شادی کے لیے خصوصی گرانٹ کا بھی اعلان کیا۔
آئی جی خیبرپختونخوا ذوالفقار حمید، چیف سیکرٹری، پولیس افسران،ایڈوائزری کونسل کے اراکین اور شہداء کے ورثاء بھی تقریب میں شریک تھے۔