اسلام آباد(ویب ڈیسک)اسلام آبادپولیس نے پچھلے ایک ہفتہ میں مجموعی طورپرسرچ آپریشنز میں 132افرادکومشکوک قراردیکر،127 موٹرسائیکلیں اور9 گاڑیاں مختلف تھانوں میں منتقل کردی ہیں۔
پولیس کے مطابق گزشتہ ہفتے مختلف کارروائیوں میں سنگین جرائم میں ملوث 164 ملزمان گرفتار کیے گئے، گرفتار ملزمان میں 104 عدالتی مفرور، مجرمان اشتہاری اور سابقہ ریکارڈ یافتہ شامل ہیں، جبکہ منشیات فروشی اور غیر قانونی اسلحہ رکھنے پر 60 ملزمان گرفتار ہوئے۔
ملزمان کے قبضے سے 1837 گرام آئس، 5930 گرام چرس، 815 گرام بھنگ، 56 بوتل شراب، تین رائفلیں، تین کلاشنکوفیں، چھ خنجر اور 31 پستول بمعہ ایمونیشن برآمد ہوئے۔
پولیس نے مختلف علاقوں میں سرچ اینڈ کومبنگ آپریشنز کے دوران 2169 افراد، 1045 گھروں، 260 دکانوں، 133 ہوٹلز، 1134 موٹر سائیکلوں اور 443 گاڑیوں کی چیکنگ کی، 132 مشکوک افراد، 127 موٹر سائیکلیں اور 9 گاڑیاں تھانوں میں منتقل کی گئیں۔
ڈی آئی جی اسلام آباد علی وسیم نے کہا کہ شہریوں کی جان و مال کے تحفظ کے لیے سرچ اور انٹیلی جنس بیسڈ آپریشنز جاری رہیں گے، غیر قانونی اسلحہ، ہوائی فائرنگ اور منشیات کے خلاف بلاامتیاز کارروائیاں جاری ہیں۔