راولپنڈی(کرائم رپورٹر)
27اکتوبر2026
راولپنڈی کے تھانہ چکلالہ کے علاقے شاہ خالد کالونی فضل ٹاؤن میں بیس سالہ نئی نویلی دلہن پرسسرالیوں کابدترین شدد،غیروں کے گھروں میں جانےسے انکارپرسر کےبال کاٹ ڈالے،قیدرکھا۔
بتایاگیاہے کہ پولیس نے بیس سالہ مسماۂ “ن ز”کے بیان پر انکے خاوندحسن ،سسراور ساس کے خلاف مقدمہ درج کرلیاہے۔
متاثرہ نئی نویلی دلہن کے مطابق اسکی عمر 20 سال ہے اور شادی پانچ ماہ قبل حسن سے ہوئی تھی جسکے بعد سے ہی خاوند اور سسرال والے اسے مار پیٹ کرتے تھے اور لوگوں کے گھروں میں کام کرنے پر مجبور کرتے تھے تاہم وہ گھر بچانے کے لئے برداشت کرتی رہی۔
مذکورہ بیس سالہ دلہن نے پولیس کوبتایا کہ 25 اکتوبر کو وہ گھر پر موجود تھی خاوند کام پر گیا تھا کہ ساس، سسر اور دیور احسن نے اسے مارا پیٹا اور سر کے بال کاٹ دئیے خاوند کے واپس آنے پر اسے بتایا تو اس نے یقین نہ کیا اور مزید مار پیٹ کر گھر کے اندر بند کر دیا۔
خاتون موقع پا کر گھر سے نکل کر پڑوس میں آ گئی اور گھر والوں کو اطلاع دی، خاتون کے بیان پر میڈیکل کروا لیا گیا ہے۔
پولیس کے مطابق مقدمہ درج کر کے خاوند، سسر اور ساس کوگرفتارکرلیاہے، تمام پہلوؤں کو مدنظر رکھتے ہوئے مزید تفتیش کی جارہی ہے۔