لاہور: وزیر اطلاعات پنجاب عظمیٰ بخاری نے کہا ہے کہ صوبائی کابینہ نے تحریک لبیک (ٹی ایل پی) پر پابندی لگانے کی منظوری دے دی ہے۔ پنجاب حکومت نے کسی مسجد، مدرسے سے متعلق کوئی فیصلہ نہیں کیا۔ پنجاب کابینہ کی جانب سے ٹی ایل پی پر پابندی کی سمری وفاق کو بھجوا دی گئی ہے۔
لاہور میں پریس کانفرنس کرتے ہوئے عظمیٰ بخاری نے کہا کہ ایک مذہبی جماعت کے احتجاج کا کوئی جواز نہیں ہے، پْرتشدد احتجاج کرنے والے ملک اور عوام کے ہمدرد نہیں ہوسکتے۔ غزہ کے نام پر احتجاج کی کال دی گئی، اور احتجاج کی یہ کال غزہ امن معاہدے کے بعد دی گئی۔
انہوں نے کہا کہ احتجاج کے نام پر سڑکیں اور راستے بند کرنے کی اجازت نہیں دی جاسکتی۔ کیا پولیس کی گاڑیاں جلانے سے غزہ کا مسئلہ حل ہوگیا۔ کیا یہ پْرامن احتجاج تھا، مذہبی جماعت کے احتجاج میں 1648 پولیس اہلکار زخمی ہوئے۔ انہوں نے کہا کہ ریاست نے فیصلہ کیا ہے کہ پاکستان ایسے احتجاج کا متحمل نہیں ہوسکتا۔
صوبائی وزیر نے کہا کہ ہڑتال کی کال مسترد کرنے پر تاجر برادری اور عوام کا شکریہ ادا کرتے ہیں، پاکستان کے عوام باشعور ہیں جو کسی بہکاوے میں نہیں آئیں گے۔