پشاور(بیورورپورٹ)
24 اکتوبر 2026
وفاقی حکومت کی جانب سے خیبر پختونخوا کی عوام کے لئے تحفہ، بدلتا، نکھرتا، مضبوط خیبر پختونخوا مہم کے تحت نیشنل ہائی وے اتھارٹی نے پشاور ناردرن بائی پاس منصوبے پر تعمیراتی کام کو تیزی سے شروع کر دیا ہے۔
بتایاگیاہے کہ چارسدہ روڈ فلائی اوور پر 25 فیصد، پیکیج ٹو پر 79 فیصد، پیکیج تھری اے پر 82 فیصد جبکہ پیکیج تھری بی پر 75 فیصد کام مکمل ہو چکا ہے۔
چارسدہ روڈ فلائی اوور پر ریٹیننگ وال کی بنیادوں میں کنکریٹ ڈالنے اور پل کی شٹرنگ کا کام جاری ہے، ناردرن بائی پاس پشاور کے پیکیج ون کا تعمیراتی کام 100 فیصد مکمل کر لیا گیا ہے۔
ناردرن بائی پاس کے پیکیج ٹو میں شولڈرز پر سب بیس میٹریل ڈالنے اور ریٹیننگ وال کی اسٹیل فکسنگ پر بھی کام جاری ہے، پیکیج تھری اے میں پل نمبر 3 پر حفاظتی تعمیراتی کام کی شٹرنگ جاری ہے۔
پیکیج تھری بی میں ناصر باغ کے قریب سڑک کی سب گریڈ تیاری اور سب بیس میٹریل ڈالنے کا کام جاری ہے، پیکیج تھری بی میں سات اسپین والے پل کے ٹرانسمز کی شٹرنگ اور اسٹیل فکسنگ پر کام جاری ہے۔
یادرہے کہ ناردرن بائی پاس منصوبے کی تکمیل کی 31 جنوری 2027 ڈیڈ لائن دی گئی ہے۔