نیشنل ڈیزاسٹر مینجمنٹ اتھارٹی(این ڈی ایم اے) کےنیشنل ایمرجنسیز آپریشن سینٹر نے دریائے راوی میں سیلابی صورتحال کی شدت کا الرٹ جاری کردیا ہے جبکہ دریائے چناب میں چنیوٹ برج پر بہاؤ میں اضافہ ہوا ہے اور بہائو855500 کیوسک اور انتہائی اونچے درجے کی سیلابی صورتحال برقرارہے۔
جمعہ کو این ڈی ایم اے سے جاری بیان کے مطابق 30اگست تا3ستمبردریائے راوی کے بالائی ملحقہ علاقوں میں بارشیں اور تھین ڈیم سے پانی کا اخراج متوقع ہے ،سیلابی ریلوں کی آمد کے باعث دریائے راوی کے بہاؤ میں نمایاں اضافہ متوقع ہے۔ دریائے راوی میں بلوکی کے مقام پر اس وقت تقریباً ایک لاکھ47 ہزار کیوسک کا بہاؤ موجود ہے۔2سے3ستمبرکے دوران یہ سیلابی ریلا سدھنائی پہنچے گا جہاں ایک لاکھ 25ہزار سے ایک لاکھ50ہزارکیوسک تک بہاؤ متوقع ہے۔سدھنائی کے مقام پر یہ سیلابی ریلا شدید سیلابی صورتحال پیدا کر سکتا ہے ۔
دریائے راوی میں سیلابی صورتحا ل کے باعث لاہور کے ممکنہ متاثرہ علاقوں میں لاہور سٹی اور رائیونڈ شامل ہے۔قصور، پتوکی، اوکاڑہ، رینالہ خورد، دیپالپور، گوگرا، تاندیانوالہ،کمالیہ، پیر محل، اڈا حکیم اور سدھنائی کے علاقے بھی متاثر ہو سکتے ہیں ،دریائے چناب میں اس وقت چنیوٹ پل پر 8لاکھ55ہزارکیوسک کے بہاؤ کے ساتھ شدید سیلابی صورتحال ہے۔ وزیراعظم کی ہدایت پر این ڈی ایم اے تمام ریسکیو و ریلیف سرگرمیاں کی نگرانی کر رہا ہے ۔
نیشنل ایمرجنسیز آپریشن سینٹر 24 گھنٹے کے لئے مکمل فعال ہے،این ڈی ایم اے سول و عسکری اداروں کے ساتھ رابطے میں ہے۔این ڈی ایم اے نے ہدایت کی ہے کہ دریاؤں کے کناروں اور واٹر ویز پر رہائش پذیر افراد فوری طور پر محفوظ مقامات پر منتقل ہو جائیں۔
مقامی انتظامیہ کی ہدایات پر فوری عمل کریں اور ہنگامی حالات میں امدادی ٹیموں سے رابطہ کریں۔سیلاب زدہ علاقوں میں غیر ضروری سفر سے مکمل گریز کریں۔ ہنگامی کٹ (پانی، خوراک، ادویات) تیار رکھیں اور اہم دستاویزات محفوظ کریں۔مزید رہنمائی کے لئے این ڈی ایم اے ڈیزاسٹر الرٹ ایپ استعمال کریں۔