سان فرانسسکو(ویب ڈیسک)
17اکتوبر2026
امریکہ کے مغربی ساحل پرسان فرانسسکو میں پاک امریکہ ٹیک کنیکٹ 2026 کا کامیاب انعقاد کیا گیاہے۔
پاکستان کے سفیر رضوان سعید شیخ نے سلیکون ویلی میں کانفرنس سے خطاب کرتے ہوئے ٹیکنالوجی، جدت اور ڈیجیٹل میدان میں باہمی اشتراک اور سرمایہ کاری میں پاک امریکہ تعاون کے فروغ پر زور دیا۔
پاکستان کے سفیرنے کہا کہ پاک امریکہ ٹیک کنیکٹ کے تیسرے ایڈیشن کا آغاز سلیکون ویلی سے کیا گیا ہے اور اس مرتبہ یہ تین مزید امریکی شہروں میں منعقد کی جا رہی ہے۔ ٹیکنالوجی میں دوطرفہ تعاون کے فروغ کے لیے اگلی کانفرنسز بالترتیب 19، 21 اور 23 اکتوبر کو ڈلاس، واشنگٹن ڈی سی اور شکاگو میں ہوں گی۔
کانفرنس میں پاکستانی ٹیکنالوجی کمپنیوں کے نمائندوں، صنعت کاروں اور کاروباری شخصیات نے بھرپور شرکت کی۔ پاکستان کی سرکردہ آئی ٹی کمپنیوں نے اپنی کارکردگی سے متعلق معلومات پیش کیں۔
“پاکستان سے سلیکون ویلی تک عالمی ٹیکنالوجی کمپنیوں کی تعمیر اور توسیع” کے موضوع پر پینل مباحثہ میں امریکی مارکیٹ میں داخلے اور مصنوعی ذہانت سمیت ابھرتی ٹیکنالوجیز پر تبادلہ خیال کیا گیا۔
پاکستان کے سفیر نے کہا کہ جدید ٹیکنالوجی میں سرمایہ کاری پاکستان اور امریکہ کے درمیان پائیدار اقتصادی تعلقات کا اہم ستون ہے۔