اسلام آباد:
چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا کی زیر صدارت شاہدرہ ڈیم منصوبے کے حوالے سے اجلاس منعقد ہوا۔ جسمیں سی ڈی اے بورڈ کے ممبر ایڈمن طلعت محمود، ممبر پلاننگ و ڈیزائن ڈاکٹر خالد حفیظ، ڈائریکٹر جنرل اسلام آباد واٹر، ڈپٹی کمشنر سی ڈی اے اور اسلام آباد واٹر کے سنئیر افسران نے شرکت کی۔
متعلقہ افسران نے چیئرمین سی ڈی اے کو واٹر مینجمنٹ منصوبوں کے حوالے سے بریفنگ دیتے ہوئے بتایا کہ واپڈا نے شاہدرہ ڈیم منصوبے کی فیزیبلٹی اسٹڈی کا عمل مکمل کرلیا ہے اور اس منصوبے کی مکمل فیزیبلٹی رپورٹ سی ڈی اے کیساتھ شئیر کر دی گئی ہے۔ بریفنگ دیتے ہوئے بتایا گیا کہ فیزیبلٹی رپورٹ میں ڈیم کیلئے اراضی کا حصول، پانی کی ترسیل، واٹر ٹریٹمنٹ پلانٹ سمیت دیگر ابتدائی تخمینے تیار کرلئے گئے ہیں۔بریفنگ دیتے ہوئے بتایا گیا کہ شاہدرہ ڈیم میں 25 ایکٹر رقبے پر پانی کو ذخیرہ کرنے کی گنجائش ہوگی۔ اسی طرح یہ منصوبہ اسلام آباد کے شہریوں کو یومیہ 10 ملین گیلن پانی فراہم کرنے کی صلاحیت رکھے گا۔ بریفنگ دیتے ہوئے بتایا گیا کہ شاہدرہ ڈیم منصوبے کی فیزیبلٹی رپورٹ کی تکمیل کیساتھ ہی تفصیلی ڈیزائن پر کام کا آغاز کیا جائیگا۔ بریفنگ دیتے ہوئے مزید بتایا گیا کہ اس منصوبے کا پی سی-ون تیاری کے بعد منظوری کیلئے جلد پیش کیا جائیگا۔چیئرمین سی ڈی اے محمد علی رندھاوا نے کہا کہ ڈیم کی اراضی کے حصول سے قبل سپارکو سے باقاعدہ سروے کرایا جائے۔ انہوں نے کہا کہ اراضی کے حصول سے متعلق تمام معاملات کو شفافیت اور قانونی تقاضوں کے مطابق حل کیا جائے۔ انہوں نے مزید کہا کہ اس منصوبے کی فیزیبلٹی رپورٹ اور تفصیلی ڈیزائن کو منظوری کیلئے جڑواں شہروں کے پانی کے مسائل حل کرنے کیلئے قائم کمیٹی کے سامنے پیش کیا جائے۔علاوہ ازیں، اجلاس میں دوتارہ ڈیم منصوبے کے حوالے سے بھی تبادلہ خیال کیا گیا۔ بریفنگ دیتے ہوئے بتایا گیا کہ دوتارہ ڈیم منصوبے کی فیزیبلٹی رپورٹ پر کام جاری ہے۔چیئرمین سی ڈی اے نے کہا کہ یہ منصوبے وفاقی دارالحکومت اسلام آباد میں پانی کی ضروریات پوری کرنے میں اہم کردار ادا کرینگے۔ انہوں نے مزید کہا کہ وفاقی دارالحکومت اسلام آباد میں بلا تعطل پانی کی فراہمی کو یقینی بنانا ہماری اولین ترجیحات میں شامل ہے۔