جنگی جنون میں مبتلا مودی سرکار نے ہیوی ڈیوٹی مسلح ڈرونز اور براہموس سپر سونک کروز میزائلز خریدنے کی تیاری کر لی۔
مودی سرکار خطے کو ایک بار پھر جنگ میں دھکیلنے کی تیاریوں میں مصروف ہے۔ مہلک ہتھیاروں کا مجموعہ تشکیل دینا اس کی آپریشنل تیاریوں میں ناکامی کا اعتراف ہے۔
یہ ایس 400 ائیر ڈیفنس سسٹم کی پاکستان کے ہاتھوں بڑی تباہی کا منہ بولتا ثبوت بھی ہے۔ جنگی ہتھیاروں کی بھر مار کر کے مودی سرکار پاکستان پر ایک بار پر جارحیت کی تیاری میں مشغول ہے۔
دی ٹائمز آف انڈیا کی رپورٹ کے مطابق بھارتی وزارت دفاع نے 87 ہیوی ڈیوٹی مسلح ڈرونز اور 110 سے زائد براہموس سپر سونک کروز میزائلز کی خریداری کی منظوری دے دی۔
جنگی سازو سامان کی مجموعی طور پر مالیت 67 ہزار کروڑ روپے بنتی ہے، بھارتی فوج کیلیے تھرمل امیجر پر مبنی ڈرائیور نائٹ سائٹ کی خریداری کی منظوری بھی دی گئی۔
بھارتی بحریہ کیلیے خود مختار سطحی جہاز، براہموس فائر کنٹرول سسٹم اور لانچر اور بھارتی فضائیہ کیلیے ماؤنٹین ریڈار کی خریداری اور سپائڈر ہتھیار کے نظام کی اپگریڈیشن کی بھی منظوری دی گئی۔
رپورٹ کے مطابق آپریشن سندور میں ہوا سے زمین پر مار کرنے والے میزائلوں کی کمی محسوس کی گئی۔