اسلام آباد(کرائم رپورٹر)انسپکٹر جنرل آف پولیس اسلام آباد کیپٹن ریٹائرڈ محمد سہیل چوہدری نے شہر بھر کا دورہ کیا اور امن و امان اور پولیس کی فیلڈ ڈپلائمنٹ کا جائزہ لیا۔
اس موقع پر سینئر پولیس افسران بھی انکے ہمراہ تھے۔
آئی جی اسلام آباد نے مختلف مقامات پر سکیورٹی ڈیوٹی پر تعینات ماتحت افسران و جوانوں سے ملاقات کی اور موقع پر سکیورٹی و پولیس انتظامات کا معائنہ کیا۔ سینئر افسران نے انہیں شہر کی مجموعی سکیورٹی صورتحال، پولیس آپریشنز اور فیلڈ ڈپلائمنٹ کے حوالے سے تفصیلی بریفنگ دی۔
آئی جی اسلام آباد نے متوقع لاء اینڈ آرڈر کی صورتحال کے تناظر میں پولیس کی آپریشنل تیاریوں کا جائزہ لیتے ہوئے افسران کو ہدایت کی کہ امن و امان میں خلل ڈالنے کی کسی بھی کوشش سے موثر انداز میں نمٹنے کے لیے مکمل الرٹ رہیں اور اپنے فرائض مستعدی سے انجام دیں۔
انہوں نے احکامات جاری کئے کہ شہریوں کی جان و مال کےتحفظ اوروفاقی دارالحکومت میں پرامن ماحول کے قیام کے لیے تمام دستیاب وسائل کو موثر انداز میں بروئے کار لایا جائے۔ پولیس افسران و جوان پوری ذمہ داری، پیشہ ورانہ جذبے اور مستعدی کے ساتھ اپنے فرائض سرانجام دیں۔
بعد ازاں آئی جی اسلام آباد کی زیر صدارت اسلام آباد پولیس کے سینئر افسران کا اہم اجلاس بھی منعقد ہوا، جس میں ضلع بھر میں امن و امان کے قیام، جرائم پیشہ عناصر کے خلاف موثر کارروائی، شہریوں کی سہولت کے لیے اقدامات اور پبلک فرینڈلی پولیسنگ کے حوالے سے تفصیلی مشاورت کی گئی۔
آئی جی اسلام آباد نے ہدایت کی کہ جرائم کی روک تھام، شہریوں کو بروقت اور موثر پولیس سروسز کی فراہمی اور عوام کے ساتھ بہتر رویے کو یقینی بنایا جائے۔ اسلام آباد پولیس شہریوں کے تحفظ اور قانون کی عملداری کے لیے تمام دستیاب وسائل کو بروئے کار لاتے ہوئے پیشہ ورانہ پولیسنگ کو مزید مضبوط بنائے گی۔