اسلام آباد(ویب ڈیسک) 190 ملین پاؤنڈ سکینڈل میں سزا یافتہ بشریٰ بی بی نے سزا کے خلاف دائر اپیل کی جلدسماعت کے لئے وفاقی آئینی عدالت سے رجوع کر لیا۔
درخواست میں موقف اختیار کیا گیا ہے کہ بشریٰ بی بی کو آنکھوں کی بیماری دوبارہ لاحق ہو گئی ہے اور جیل میں علاج کی ناکافی سہولیات موجود ہیں۔
درخواست میں مؤقف:
– بشریٰ عمران 54 سالہ خاتون اور پاکستان کی سابق خاتونِ اول ہیں۔
– وہ اڈیالہ جیل میں سزا کاٹ رہی ہیں۔
– انہیں 17 جنوری 2025 کے فیصلے کے ذریعے 7 سال قید بامشقت کی سزا سنائی گئی۔
– بشریٰ عمران کو نیب آرڈیننس کی دفعہ 9(اے)(12) کے تحت معاونت،مدد اور اکسانے کے الزام میں سزا سنائی گئی۔
درخواست میں کہا گیا ہے کہ کیس کا فیصلہ نہ ہونے کے باعث مسلسل قید سے بشریٰ بی بی کی صحت متاثر ہو رہی ہے، مزید تاخیر ان کی باقی ماندہ بینائی اور مجموعی صحت کے لئے خطرہ بڑھا سکتی ہے۔
درخواست گزار نے موقف اختیار کیا کہ بشریٰ بی بی جیل میں ہیں اور اپیل سماعت کے لئے مقرر ہونے کی منتظر ہے، طویل اور غیر واضح تاخیر سے انہیں پہلے ہی شدید نقصان پہنچ چکا ہے۔
درخواست میں استدعا کی گئی ہے کہ انصاف کے مفاد میں بشریٰ بی بی کی اپیل کو 21 ستمبر 2026 سے شروع ہونے والے ہفتے میں مقررکیا جائے اور جلد سماعت کی درخواست منظور کی جائے۔