اسلام آباد (ویب ڈیسک)
اسلام آباد ہائیکورٹ میں متاثرین زمین الاٹمنٹ کیس میں عدالت سے غلط بیانی کرنے کے الزام پر ممبر اسٹیٹ سی ڈی اے محمد زمان وٹو کے خلاف توہین عدالت کارروائی کا آغاز کر دیا گیاہے۔
اسلام آباد ہائیکورٹ نے ممبر اسٹیٹ سی ڈی اے محمد زمان وٹو کو توہین عدالت کا نوٹس جاری کرتے ہوئے سات روز میں جواب طلب کر لیا۔عدالت نے کہا کہ محمد زمان وٹو وضاحت کریں کیوں نہ ان کے خلاف توہین عدالت کارروائی شروع کی جائے۔
عدالت نے ڈپٹی ڈسٹرکٹ پراسیکیوٹر عدنان علی کو توہین عدالت کیس میں پراسیکیوٹر مقرر کر دیا اور رجسٹرار آفس کو توہین عدالت کیس کی الگ فائل تیار کرنے کا حکم دے دیا
حکم نامے میں کہا گیا ہے کہ محمد زمان وٹو کا 16 ستمبر کو عدالت میں پیش نہ ہونا توہین عدالت کے زمرے میں آتا ہے، وکیل درخواست گزار کے مطابق محمد زمان وٹو نے طبیعت ناساز ہونے کے باعث عدالت سے سماعت ملتوی کرنے کی استدعا کی تھی، وکیل درخواست گزار نے جسٹس انعام امین منہاس کی عدالت میں اسی روز محمد زمان وٹو کی حاضری کا ریکارڈ پیش کیا
چیف جسٹس سرفراز ڈوگر نے دو صفحات پر مشتمل تحریری حکم نامہ جاری کرتے ہوئے کیس کی مذید سماعت ملتوی کر دی ہے۔