اسلام آباد (ویب ڈیسک) چیئرمین سی ڈی اے نے ڈپلومیٹک انکلیو کا تفصیلی دورہ کیا اور جاری ترقیاتی، تزئین و آرائش اور انفراسٹرکچر کی بہتری کے کاموں کی پیش رفت کا جائزہ لیا۔ اس موقع پر ڈی جی ورکس اور دیگر سینئر افسران بھی موجود تھے۔
دورے کے دوران چیئرمین سی ڈی اے نے سڑکوں، فٹ پاتھوں، سیکیورٹی گیٹس، چیک پوسٹس، باؤنڈری وال، ایل ای ڈی لائٹنگ، فینسنگ، لینڈ اسکیپنگ اور گرین بیلٹس سمیت جاری کاموں کا معائنہ کیا۔ متعلقہ افسران نے پیش رفت پر تفصیلی بریفنگ دی۔
چیئرمین سی ڈی اے نے ہدایت کی کہ تمام کام منظور شدہ ڈیزائن اور مقررہ معیار کے مطابق جلد مکمل کیے جائیں، معیار پر کوئی سمجھوتہ نہ کیا جائے اور سفارتی مشنز و رہائشیوں کو کم سے کم تکلیف ہو۔
انہوں نے لینڈ اسکیپنگ، صفائی ستھرائی اور روشنی کے انتظام پر خصوصی توجہ دینے اور تمام شعبوں کے درمیان مؤثر رابطہ کاری کی بھی ہدایت کی۔