اسلام آباد (ویب ڈیسک) سیکرٹری اسٹیبلشمنٹ ڈویژن بیرسٹر نبیل احمد اعوان نے کہا ہے کہ سچائی اور دیانت داری ایک سرکاری افسر کی نمایاں خصوصیات اور موثر عوامی خدمت کی بنیاد ہیں۔
نیشنل انسٹی ٹیوٹ آف پبلک ایڈمنسٹریشن اسلام آباد میں 47 ویں مڈ کیریئر مینجمنٹ کورس کی پاسنگ آؤٹ تقریب سے خطاب کرتے ہوئے انہوں نے کہا کہ افسران پر دیانت داری، پیشہ ورانہ طرز عمل اور احساس ذمہ داری کے اعلیٰ معیار برقرار رکھنے کی ذمہ داری عائد ہوتی ہے۔
انہوں نے سرکاری اداروں کو مستحکم بنانے اور عوامی خدمات کی موثر فراہمی کے لیے اخلاقی اقدار اور ذمہ دارانہ طرز عمل کی اہمیت پر زور دیا۔
تقریب میں 44 افسران میں اسناد تقسیم کی گئیں۔ ڈی جی نیپا عاصم اقبال نے کہا کہ یہ کورس افسران کو اعلیٰ ذمہ داریوں کے لیے قائدانہ اور انتظامی صلاحیتوں سے آراستہ کرتا ہے۔ تقریب میں ریکٹر این ایس پی پی سید معظم علی اور چیف انسٹرکٹر اعجاز باجوہ بھی موجود تھے۔