اسلام آبادد(ویب ڈیسک )سی ڈی اے نےتجاوزات کیخلاف جاری مہم میں ابتک مجموعی طور پر2,490 کنال اراضی واگزار کرائی۔
سی ڈی اے انتظامیہ کے مطابق جاری مہم میں 1,400 کنال سے زائد اسٹیٹ لینڈ جس میں سابقہ مسلم کالونی بھی شامل ہے، 712 کنال قیمتی لینڈ، سیدپور اور نیشنل پارک سے ملحقہ علاقوں میں 320 کنال اراضی واگزار کرائی گئی جس کی مالیت اربوں روپے ہے۔ جی ٹی روڈ، ترنول، اسلام آباد ایکسپریس وے اور سری نگر ہائی وے پر بھی 800 کنال سے زائد اراضی پہلے ہی واگزار کرائی جا چکی ہے۔
اسی طرح سیکٹر ای-12 میں تاریخی پیش رفت کرتے ہوئے سی ڈی اے نے تقریباً 290 کنال سرکاری اراضی واگزار کرا لی ہے۔ کارروائی کے دوران ای-12/2 میں 16 کنال اراضی پر قائم نجی سکیورٹی گارڈز کی رہائش، ایک ہالیڈے ہوم اور کرائے پر دی گئی 14 دکانیں ختم کر کے قبضہ واپس لے لیا گیا۔ واگزار اراضی پر ترقیاتی کام دوبارہ شروع کر دیے گئے ہیں، رہائشیوں نے کارروائی کا خیر مقدم کیا ہے۔
سی ڈی اے انتظامیہ کاکہنا ہے کہ اسلام آباد ایکسپریس وے سروس روڈ ایسٹ پر بلڈنگ کنٹرول اور انفورسمنٹ نے ضلعی انتظامیہ اور پولیس کے تعاون سے غیر قانونی تعمیرات کو سیل کرنے کی کارروائی شروع کر دی گئی ہے۔
ادھر ایچ-9 اور آئی-9 کی گرین بیلٹس میں 7 دکانیں، 9 عارضی ہوٹل، 7 کمرے، 7 تندور، 4 واش رومز، 3 ماربل اسٹالز، 3 کنٹینرز، 3 شیڈز اور 1 سروس اسٹیشن مسمار کر دیا گیا جبکہ 4 ٹرالیاں سامان سمیت ڈی ایم اے اسٹور منتقل کر دی گئیں ہیں۔
سی ڈی اے انتظامیہ نے وارننگ دی ہے کہ واگزار اراضی پر دوبارہ قبضے روکنے کے لئے ڈرون نگرانی اور ڈیجیٹل میپنگ کا نظام مضبوط بنایا جا رہا ہے اور پانچ نکاتی پالیسی کے تحت اراضی واگزاری، قانون کا نفاذ، دوبارہ تجاوزات کی روک تھام، ترقیاتی عمل میں تیزی اور شہریوں کو سہولت فراہم کرنے کا عمل ہر صورت جاری رکھاجائے گا۔