راولپنڈی (ویب ڈیسک)
3 نومبر 2026
اڈیالہ جیل میں بانی پی ٹی آئی اور بشریٰ بی بی سے سینئر وکیل بیرسٹر سلمان صفدر کی 40 منٹ ملاقات کرا دی گئی۔
سلمان صفدر کے مطابق متعدد درخواستوں کے بعد بانی پی ٹی آئی سے 7 ماہ اور بشریٰ بی بی سے 11 ماہ بعد ملاقات ہوئی، تاہم تمام مقدمات اور قانونی معاملات پر مشاورت کے لیے وقت ناکافی تھا۔
بیرسٹر سلمان صفدر نے سماجی رابطے کی ویب سائٹ ایکس پر اپنی پوسٹ میں بتایا کہ جیل حکام نے سہ پہر 4 بج کر 30 منٹ پر ملاقات کرائی۔ ملاقات کے دوران بانی پی ٹی آئی اور بشریٰ بی بی نے انہیں اپنی صحت اور جیل میں رہن سہن کے حالات سے آگاہ کیا۔
انہوں نے بتایا کہ دونوں نے بعض قانونی معاملات اور مقدمات سے متعلق نئی ہدایات بھی دیں۔ سلمان صفدر کا کہنا تھا کہ ملاقات کا دورانیہ تمام مقدمات اور قانونی امور پر تفصیلی بات چیت کے لیے ناکافی رہا۔