اسلام آباد (ویب ڈیسک) انسداد دہشت گردی عدالت اسلام آباد نے پی ٹی آئی رہنما شیریں مزاری کی صاحبزادی ایمان مزاری ایڈووکیٹ اور ان کے شوہر ہادی علی چٹھہ ایڈووکیٹ کو تھانہ کوہسار کے مقدمہ میں جوڈیشل ریمانڈ پر اڈیالہ جیل بھیج دیا ہے۔
ایمان مزاری اور ہادی علی چٹھہ کو انسداد دہشت گردی عدالت کے جج ابوالحسنات محمد ذوالقرنین کی عدالت میں جمعرات کی رات پیش کیا گیا۔
وفاقی پولیس کی جانب سے عدالت میں 30 دن کے جسمانی ریمانڈ کی استدعا کی گئی تھی تاہم عدالت نے پولیس کی استدعا مسترد کرتے ہوئے ایمان مزاری اور ہادی علی چٹھہ کو جوڈیشل ریمانڈ پر جیل بھیجنے کا حکم دے دیا۔
ایمان مزاری اور ہادی علی چٹھہ کیخلاف تھانہ کوہسار میں مقدمہ درج ہے۔ دونوں کو اڈیالہ جیل سے گرفتاری کے بعد رات کو عدالت پیش کیا گیا تھا۔
واضح رہے کہ ایمان مزاری اور ان کے شوہر کو جمعرات کو ہی سپریم کورٹ نے اسلام آباد ہائی کورٹ میں ان کی سزا کیخلاف زیرالتواء اپیلوں پر فیصلہ تک دو لاکھ روپے کے ضمانتی مچلکوں پر رہا کرنے کا حکم دیا تھا۔ جس کے بعد اسلام آباد پولیس نے انہیں تھانہ کوہسار کے ایک مزید مقدمہ میں گرفتار کر کے انسداد دہشت گردی عدالت میں پیش کیا۔