اسلام آباد (ویب ڈیسک) رواں مالی سال کے ابتدائی دو ماہ میں پاکستانی معیشت میں بہتری کے واضح رجحانات سامنے آ گئے۔
ذرائع کے مطابق پاکستان کا کرنٹ اکاؤنٹ خسارہ اگست میں 70 فیصد کمی سے صرف 9 کروڑ 80 لاکھ ڈالر رہ گیا جبکہ دو ماہ کا مجموعی خسارہ 36 فیصد کم ہوا۔
بیرونی کھاتوں میں بہتری کے ساتھ بڑی صنعتوں کی پیداوار میں سالانہ 3 فیصد اور ماہانہ 9.5 فیصد اضافہ ریکارڈ کیا گیا۔ ملک میں نئی کمپنیوں کی رجسٹریشن میں 45 فیصد اضافہ ہوا جس کے بعد رجسٹرڈ کمپنیوں کی مجموعی تعداد 3 لاکھ 12 ہزار ہو گئی۔
ذرائع کے مطابق مالی سال 2027 کے ابتدائی دو ماہ میں 7.3 ارب ڈالر پاکستان پہنچے جبکہ ترسیلات زر میں سالانہ 17 فیصد اضافہ ہوا۔ اسی دوران سروسز برآمدات میں 29 فیصد، آئی ٹی برآمدات میں 17 فیصد اور فری لانسرز کی آمدن میں 42 فیصد اضافہ ریکارڈ کیا گیا۔