اسلام آباد(کرائم رپورٹر)آئی جی پولیس اسلام آباد کیپٹن ریٹائرڈ محمد سہیل چوہدری نے وفاقی پولیس افسران کو ادویات،اشیائے خورونوش اورفوری خراب ہونے والی اشیاء کے پکڑے گئےکنٹینرز فوری مالکان کے حوالے کرنے کا حکم دے دیا ہے۔
اس بارے میں پاکستان گڈز ٹرانسپورٹ الائنس کے وفد نے آئی جی سے ملاقات کی تھی اور شکایت کی تھی کہ ادویات اور اشیاء خورونوش سے لدے کنٹینرزبھی اسلام آبادپولیس نے پکڑرکھے ہیں ۔ملاقات میں گڈز ٹرانسپورٹ سے متعلق امور، کنٹینرز کی دستیابی اور تاجروں و ٹرانسپورٹرز کو درپیش مسائل پر تبادلہ خیال کیا گیا۔
اس موقع پرآئی جی اسلام آباد نے ہدایت کی کہ ادویات، اشیائے خوردونوش اور دیگر فوری خراب ہونے والی اشیاء سے لدے کنٹینرز کو بلا تاخیر ان کے مالکان کے حوالے کیا جائے، تاکہ شہریوں اور کاروباری طبقے کو غیر ضروری مشکلات کا سامنا نہ کرنا پڑے۔ انہوں نے کہا کہ امن و امان برقرار رکھنے کے لیے استعمال کیے جانے والے کنٹینرز کے مالکان کو ان کا مناسب کرایہ بھی ادا کیا جائے گا۔
آئی جی اسلام آباد نے کہا کہ تاجر برادری اور ٹرانسپورٹرز کو درپیش جائز مسائل کا بروقت حل اور انہیں سہولت فراہم کرنا اسلام آباد پولیس کی ترجیحات میں شامل ہے۔
بعد ازاں آئی جی اسلام آباد محمد سہیل چوہدری نے تھانہ نیلور کا دورہ کیا، جہاں انہوں نے جاری تعمیراتی و تزئین و آرائش کے کام کا تفصیلی جائزہ لیا اور تھانے کے مختلف حصوں کا معائنہ کیا۔ انہوں نے ہدایت کی کہ تمام تعمیراتی کام مقررہ معیار اور طے شدہ مدت کے مطابق جلد مکمل کیے جائیں اور تھانے میں شہریوں کے لیے بہتر سہولیات، مناسب انتظار گاہ، صفائی ستھرائی اور خوشگوار ماحول یقینی بنایا جائے۔